Deprecated: Function set_magic_quotes_runtime() is deprecated in /home/sveitabrudkaup/sveitabrudkaup.is/textpattern/lib/txplib_db.php on line 14
Sveitabrúðkaup: Fjölskylda brúðarinnar

Fjölskylda brúðarinnar

Tommi og Imba voru í góðum efnum. Gott einbýlishús. Jeppi og frúarbíll. Utanlandsferðir þó undir lokin á hjónabandinu hafi það verið svo að Imba kaus frekar sólarlandaferðir á meðan Tommi fór í veiðiferðir. Hún átti það tilað sletta vel í sig í þeim ferðum og kom oftar en ekki heim illa þunn og vel sólbrunnin á einni hlið. Að lokum var Tomma nóg boðið. Hann ákvað að þau ákvæðu í sameiningu að skilja um stundarsakir og hún færi í meðferð. Eða einsog hann orðaði það: maður tekur rétta ákvörðun og svo kemur í ljós hvort hún er röng og þau gætu litið á þetta sem vorhreingerningu. Það væri kominn tími tilað setja smá Ajax í lífið.

Atli var fluttur að heiman en Inga bjó heima. Það fór svo sem ekki framhjá henni hávaðinn í foreldrunum fyrir skilnaðinn. Hún ræddi þetta stundum við pabba sinn sem sagði að þetta væri þeirra líf og þeirra hávaði og hún skyldi bara reyna að leiða þetta hjá sér og gaf henni 8 GB iPod og heddfóns. Þegar foreldrar Ingu sögðu henni að þau ætluðu að skilja og að mamma hennar ætlaði í meðferð hrundi veröldin og Inga eyddi miklum tíma með Láru, bestu vinkonu sinni sem stóð með henni hundrað prósent. Atli var meira kúl á því enda búinn að koma sér upp sínum eigin heimi en hann hafði áhyggjur af litlu systur.

Tommi hélt einbýlishúsinu, jeppanum og veiðistöngunum. Þar sem Imba var að fara í meðferð þar sem nóg var af húsgögnum, sá Tommi enga ástæðu til þess að hún væri að druslast með einhver býsn af húsgögnum með sér svo þau urðu eftir á sínum stað. Imba fór í meðferð og hitti Svan svo í staðinn fyrir að fara vestur á Dýrafjörð, einsog hún ætlaði sér eftir meðferðina, fóru hún og Svanur suður í Kópavog í Krossinn. Imba reyndi fyrst að fela samband þeirra Svans en þegar þau fluttu saman í blokk í Vesturbænum var varla hægt að halda feluleiknum áfram. Þannig að skilnaðurinn sem átti að vera um stundarsakir varð langvarandi og Imba seldi frúarbílinn og fékk sér annan ódýrari svo þau gætu fjármagnað viðskipti Svans sem var alltaf alveg að meika það í bissness.

Inga og Tommi bjuggu tvö í einbýlishúsinu. Smámunasemi pabba hennar: ekki vera of nálægt, ekki svona hátt, er þetta ekki aðeins of mikið, það fór aðeins niður, passaðu að það fari ekki í sætið, sem þær mæðgur höfðu getað skipt á milli sín og látið einsog vind um eyrun þjóta nauðaði nú einsog dragsúgur í eyrum Ingu og eftir tvo mánuði gafst hún upp og flúði. Inga hafði kynnst Barða og Grjóna á Kaffi París þar sem hún vann. Það verður að segjast einsog satt er að hún hafði meiri áhuga fyrir Grjóna en Barða tilað byrja með en að lokum varð Barði fyrir valinu og þegar Inga flúði að heiman leitaði hún skjóls hjá Barða sem tók henni opnum örmum. Þar er hún enn og kann ágætlega við sig enda er Barði auðveldur í meðförum og ekki með neitt pex.

Atli er ekki par hrifinn af Barða. Honum finnst hann engan veginn samboðinn litlu systur en þegar Inga hefur bitið eitthvað í sig þá er erfitt að fá hana tilað skipta um skoðun. Ef eitthvað er verður hún bara ennþá þverari fyrir vikið. Í rauninni hefur Atli ekki hugmynd um af hverju hann þolir ekki Barða. Hann hefur í rauninni ekkert útá hann að setja og það er kannski ástæðan fyrir því að Atli þolir ekki Barða.