Deprecated: Function set_magic_quotes_runtime() is deprecated in /home/sveitabrudkaup/sveitabrudkaup.is/textpattern/lib/txplib_db.php on line 14
Sveitabrúðkaup: Imba

Imba

er fædd á Þingeyri við Dýrafjörð öðru hvoru megin við 1950. Er treg tilað upplýsa hvoru megin. Hún fluttist ung til Reykjavíkur með fjölskyldunni – nánar tiltekið á Barónsstíginn og gekk í Austurbæjarskólann. Seinna flutti fjölskyldan í Vesturbæinn og þá tók Hagaskólinn við menntuninni. Eftir landspróf fór hún austur á Laugarvatn og byrjaði í menntaskólanum þar en kláraði ekki stúdentinn og neitar að segja hvers vegna. Sögur herma að hún hafi haldið við rektor eða kennara og hálfpartinn verið flæmd burtu og illar tungur segja að fóstureyðing hafi fylgt í kjölfarið. Hún ákvað að leggja fyrir sig skrifstofustörf og vinnur nú sem bókari hjá verktakafyrirtæki.

Imba var mikill djammari og kunni vel að skemmta sér og kann reyndar enn. Eftir mörg kærastasambönd sem flest hófust í Glaumbæ og enduðu í Glaumbæ kynntist hún Tomma – líka í Glaumbæ – og 1972 giftust þau. Hún ætlaði ekkert endilega að giftast honum en kunni ekki við að segja nei þegar hann var búinn að panta prestinn og kaupa hringana en sambandið þróaðist uppí ást og væntumþykju. Imba var heimavinnandi á meðan hún gekk með börnin og í nokkurn tíma eftir það.

Hún hefur alltaf verið svolítið upptekin af útliti sínu og finnst erfitt að vera á breytingaskeiðinu. Fær gjarnan svitakóf uppúr þurru, jafnvel grátköst þegar verst lætur og skapgerðarbrestir eru stundum áberandi undir álagi en aldrei myndi hún viðurkenna fyrir öðrum að breytingaskeiðið væri hafið. Hún er stundum einsog útá þekju og kemur með undarlegar spurningar uppúr þurru. Á það tilað gleyma símanum og gleraugunum og er með hvort tveggja. Símann í höndunum og gleraugun á nefinu.

Imba átti við smávægilegt áfengisvandamál að stríða að eigin sögn og fór í meðferð jafnvel þótt henni þætti ekki mikil ástæða til. Þar kynntist hún Svani sem huggaði hana þegar hún var langt niðri og í sárum. Hann gat komið henni í gott skap og fengið hana tilað hlæja og gleyma sárindum og sársauka svo þegar meðferðinni lauk fór Imba heim til Tomma og pakkaði niður fötum, snyrtidóti, sjálfshjálparbókum og kettinum og flutti inn til Svans. Imbu þykir mjög vænt um börnin sín en er afar lítið hrifin af tilvonandi tengdasyni – brúðgumanum. Hún reykir í laumi.

Imba hefur gaman af tónlist, sérstaklega kántrímúsík og tekur gjarnan lagið á góðri stundu. Uppáhaldslagið hennar er Stand by Your wo-Man með Tammy Wynette. Imba er ekki mikill náttúruunnandi, þekkir einungis þrjú fjöll fyrir vestan og Esjuna – þá hlið sem snýr að Reykjavík.


Hinir:
Svanur
Atli
Inga
Tommi